Стерјовски: Илинден е вечен симбол на слободата, достоинството и националниот опстанок, а за Македонците во Албанија претставува инспирација за продолжување на борбата за национални права.
По повод националниот празник 2 Август – Илинден, Македонската алијанса за европска интеграција (МАЕИ) упати честитка до Македонците, во која се нагласува дека Илинден е најсветлиот ден во македонската историја и траен симбол на вековната борба за слобода, правда, достоинство и национален опстанок.
Во честитката, потпишана од претседателот на МАЕИ, Васил Стерјовски, се истакнува дека Илинден ги обединува сите Македонци, без разлика каде живеат, околу заедничките вредности – љубовта кон Македонија, зачувувањето на националниот идентитет, македонскиот јазик, културата и историското наследство.
„Илинден нè потсетува на херојството и саможртвата на илинденците од 1903 година, како и на државотворните идеали на АСНОМ од 1944 година. Тоа е празник што ги обединува сите Македонци, без разлика каде живеат, околу заедничките вредности – љубовта кон Македонија, зачувувањето на националниот идентитет, јазикот, културата и историското наследство“, се наведува во честитката.
МАЕИ нагласува дека за Македонците во Албанија, Илинден има особено значење, бидејќи претставува поттик за продолжување на напорите за заштита и унапредување на националните права, еднаквоста и зачувувањето на македонскиот идентитет.
„За нас, Македонците во Албанија, Илинден претставува неисцрпна инспирација да продолжиме достоинствено да се бориме за заштита и унапредување на нашите национални права, за еднаквост, почитување и зачувување на македонскиот идентитет за идните генерации“, се истакнува во пораката.
Во честитката се упатува повик духот на Илинден да биде водилка кон поголемо единство, солидарност и заедничко дејствување во интерес на македонската заедница.
„Нека духот на Илинден нè води кон единство, солидарност и нови успеси во остварувањето на нашите заеднички цели. Честит Илинден! За многу години!“, порачува претседателот на МАЕИ, Васил Стерјовски.