Во рамките на 29. Семинар на Работната група за словенски малцинства во Европа, организиран од Федералната унија на европските малцинства (ФУЕН) во соработка со Македонското друштво Илинден-Тирана, се одржа тематскиот панел „Положбата на македонското национално малцинство во Република Албанија“, како и изложбата „Образованието на мајчин македонски јазик во Република Албанија“.
На панелот свое излагање имаше почесниот претседател на Македонска алијанса за европска интеграција, проф. д-р Кимет Фетаху, кој говореше на тема „Реалноста и проблемите на малцинствата во Република Албанија“.
Во своето излагање, Фетаху истакна дека прашањето на етничките заедници и националните малцинства претставува едно од најважните прашања поврзани со човековите права во современа Европа. Тој нагласи дека и покрај позитивните чекори направени во последните децении, националните малцинства во Албанија и понатаму се соочуваат со бројни предизвици во областа на образованието, медиумите, политичкото претставување и институционалната поддршка.
Посебен акцент беше ставен на потребата од почитување на принципот на слободно самоопределување, гарантирање на образованието на мајчин јазик, обезбедување пристап до јавните медиуми и подобрување на застапеноста на малцинствата во државните институции и во Парламентот на Албанија.
Фетаху потсети дека македонското национално малцинство во Албанија има долгогодишно историско присуство и придонес во општествениот живот на земјата, при што нагласи дека почитувањето на малцинските права претставува важен показател за демократскиот развој и европската интеграција на државата.
Во заклучокот од своето излагање, тој повика на понатамошно усогласување на законодавството и институционалните практики со европските стандарди за заштита на националните малцинства, со цел изградба на вистински мултиетничко, мултикултурно и демократско општество.