Македонците во Албанија традиционално го одбележуваат празникот Свети Василиј Велики, со кој се означува почетокот на Новата година според јулијанскиот календар.
Македонците од Мала Преспа со голема чест и духовна радост го одбележаа празникот Свети Василиј каде во селото Леска, во црквата „Свети Василиј”, Света Божествена Литургија, одржаа свештениците Алексо Темелко и Ропи Арѓири, по што беше кршена василичарската погача.
Најсреќен беше Кире Танас од селото Зрновско, кој посака многу здравје, среќа и благосостојба.
-Честит и вековит да ни е празникот. Среќата ми се насмевна мене и за тоа многу сум радосен. Посакувам најпрво здравје, среќа и насекаде нека владее мир, посака Танас.
По традиција и овој пат со Македонците беше Васил Стерјовски, претседател на македонската партија, Македонска алијанса за европска интеграција, МАЕИ.
Во свое и име на партијата посака Стара Нова година да донесе здравје, среќа и благосостојба во домовите на сите Македонци каде и да се.
-Нека ни биде и година на единство, успеси и напредок за сите нас, Македонците во Албанија, и нека продолжиме заедно да го чуваме и афирмираме нашиот македонски идентитет, рече тој откако запали свеќа за здравје.